Шошо садиктак толеш

Шошо садиктак толеш,
Кече тöрза гоч модеш.
Пагытым ешна вуча,
Янда гоч пиал конча…

Ме она лÿд осал деч,
Шогална рыҥ элна верч!
Вийнам иктыш погена,
Сеҥымаш дек вашкена.

Кöм ме тыште ужына,
Чыландам вик ÿжына:
Полшыза ынде йырваш,
Мыланна кÿлеш келшаш!

Ситыш ваш-ваш кöранаш,
Игылташ, тошкаш, вурсаш..
Пырля ме куат улна!
Кöргö чоннам куштена.

Пушеҥге тÿсшым вашталта,
Игече эркын кылмыкта.
Кеҥежын шокшыжо йомеш,
Но шошо садиктак толеш!

Икмарда Пургыж

Тыланымаш

Ме ÿмылыш савырнена,
Но мо путрак оҥайже:
Кышажым саадак кодена!
Кöлан гын тидын деч пайдаже…

Ынде ме эркын йомына,
Ала шöра мемнам Осалже?
Вашмутым кö деч йодына?
Да уло мо шургаш амалже…

Йылт шошо лум гай шулена.
Молан гын чот ырыктедаже?
Ме пуйто кушкыл улына,
Шавалтыде кодеш вÿддаже…

Лач иктым ойлымо шуэш:
Вет тиде кышана поянлык!
Да тудым аныклаш кÿлеш,
Лиеш чай тенданат яндарлык…

Икмарда Пургыж

Кугезе мландыш унала

Чонем мура,
Кунам моткоч мÿндыр кундем гыч,
Ала-кушеч тора
Да тидын годымак пеш лишыл Эл гыч

Мемнан дек толыт родотукымна.
 

Кöргемже кычкыра,
Родем-влак, толза теже лишкырак,
Улам чай ковыра,
Но öндалам тендам мый чотырак.

Те шижыда? Ме иквереш веет улына!
 

Куат пура,
Кунам же родо-шамыч унала толда,
Улда веет те тура,
Умыледа? Кугезе мландыш коштыда!

А ме каласена, ме эрык вийым шижына!
 

Шÿмем кыра,
Пеш йöсö тендан ден чеверласаш,
Молан чон ойгыра?
Те каеда, мемнан же вет кÿлеш кодаш.

Кугезе мландым аралаш. Вашлийына!

Икмарда Пургыж

Чонемже ялышкак шупшеш

Оласе шукыпачашан кÿпöрт,
Изи гына тыглай пачер,
Чонем, йодам мый, тый ит шорт,
Молан темда гын тиде чер…

Шижам, адак ÿжат пÿртÿсыш,
Тый пуйто четлык гыч лекнет.
Но тиде кумыл эркын шулыш,
Да, витне, садланак вурсет…

Мый ялын эргыже улам,
Илем гынат ынде олаште.
Тыгаяк витне шочынам,
Ок келше чонетлан тораште. 

Кунам гын пöртыламже ялыш,
Мый тушто эрыкым шижам!
Осалже пуйто тидым палыш,
Да адакат олаш толам…

Икмарда Пургыж