Шолып милиций наряд

01.12.05

Марий мер пашаеҥ-влакым шолып эскерымаш да нунын ваштареш шылтыкым кычалмаш республикыште утларак веле ылыжеш. 

22 ноябрьыште, 8 шагат кастенe Регион-влак кокласе "Марий ушем" мер организацийын вуйлатышыже Нина Максимова Мер-политик рÿдерысе 203 пöлемыш эрлалан кÿлшö газет-влакым налаш пурен. 

2005 ийлан палемдыме ойпидыш (договор) почеш тиде пöлемым "Марий ушемлан" пеҥгыдемдыме. А тений 24 апрельысе отчет-сайлымаш конференцийыште Нина Максимовам "Марий ушемын" вуйлатшыжылан сайлыме. 

Мксимован пöлемыш пурен шуктымекыже, иктаж 10 минут гыч, шемын койын, 10-15 МВД пашаеҥ ювыге толын пурен шогалыныт. Максимован ÿмбакыже вигак тыгай йодыш дене кержалтыныт: 

- Кузе да молан тышке логалында? Мом те тыште ыштылыда?! Кö те улыда?! 

Но тыгодым вуйлатышылан нигö нимогай документым ончыктен огыл да ончыкташат шонен огыл: тудыжо тидым ышташ йодын гынат. 

- Ом умыло, а те молан мер организацийын пöлемышкыже тыге керылт пуреда? -  манмылан нуно кÿчыкын да тура вашештеныт: 

- Мыланна кÿшетныт тергаш! 

Тыге "Марий ушем" вуйлатышым шке пöлемыштыже 3 шагат наре шинчыктеныт. Протоколым возеныт да кидым пыштыктеныт. "Пöлемыште … ÿстел… пÿкен… пеледыш кöршöк…" Тидыже, очыни, юрист йылмыште "осмотр обстановки происшествия" маналтеш. 

Урем гыч кок рвезым, "понятой-влакым муын пуртеныт"…

Н. Максимован Мер-политик рÿдерын оролжо деч "кöмыт нине улыт, кузе толын лектыныт да кö нуным ÿжыктен?" манын йодмылан тудыжо вачым гына туртыктен: "ом пале, мылам иктат документым ыш ончыкта. Милиций улытыс…"

МВД пашаеҥ-влак деч кö улыда манын йодмылан, нунышт вашештеныт: "Тиде кечын пашам ыштыше бригаде. Чотк кÿлеш гын, эрла МВД-ште пален налыда!"

Эрык Йыван