Ода Маркеловлан

04.08.05

Мä, марынвлä, тӹньӹм пиш яратенä, 
чоте мактенä дä ялетӹмäт вäк нылаш
             йäмдӹ ылына.
Тенге яратенä - тӹньӹм президентешäт,
             вäк айыреннä.
Марий Элӹм марын вуйлатышашлык гӹнят
ӹшкӹмнäм мä тӹлäнет ӹнянен пуэннä.
Халыкем ваштареш шукым ӹштенäт гӹнят,
             господин Маркелов,
мӹнь тӹлäнет тӹньӹм мактымы мырем,
тӹньӹм мактымы лыдышем,
тӹньӹм мактымы одем сирӹнем.
Мäмнäн Йыл тӹрӹшкӹ, тумерäн, 
йäктерäн дä кожан мÿлäндӹшкӹ,
тагышец мӹндӹрцӹн
толметӹм цилäн пäлäт.
Изи годшенок обком партим 
вуйлатымет шон, а ӹндежӹ,
цäшешнä, сусуэшнä - тӹнь ӹшке
цельӹшкет шонат- мä донна вуйлаташ
тӹнгäлӹнäт: изиш туркавлä, изиш нерäнвлä,
изиш ӹшке семӹньнä шанышывлä доно.
Мӹнь тӹнь верцет сусу ылам, кынам попалтет,
йäнгем ӹвӹртä, мӹнь тӹнь монгырыштет ылам-
тӹнь мäмнäн туркаланылмынам пӹтäрӹнет,
нервлäнä гӹц савен-савен колтет дä
ӹшке семӹньнä шанаш цäрӹнет.
Ти шотышты тӹнь шукым ӹштен шоктенäт:
ваштареш ылшывлäэтӹм поктыл колтенäт,
дä пäшäштӹм ярдымеш лыктынат,
кодшывлäжӹм гӹнь кыце-шон лÿдӹктӹлäт.
Нӹнӹжӹ анзылнет цӹтӹрен каштыт.
Тидӹжӹ тӹлäнет кайф агыл ма?
Весӹвлäм лÿдӹктӹлäш?
Весӹвлäмм, йӹлмӹм цäрäш, пӹтäрäш?
Весӹвлäм цӹтӹрӹктäш?
Попат, ӹнде чиновниквлääт анзылнет
лач ялварня мыч веле сäрнäт.
Тенге гӹнят, тӹнь соок тйöр ылат:
 шанымем доно
нӹнӹлäн тенгеок и келеш- тек
нӹнӹ ваштарешет тӹргештӹлäш цäрнäт
дä ышмаштым питӹрäт.
Тӹнь Москва эргäш ылат дä мäмнäн 
шӹргӹ лошкына Москван сотыжым 
кандаш толынат гӹнят,
ти сотетшӹ утла пӹцкемӹш ылеш,
лӹмӹнок политика дон экономика пӹцкемӹш
доно кӹлдäлтӹн манын попат.
Вуйта тӹнь лач ӹшке гишäнет веле
шанет- тидӹ гишäнäт халык келесäлäш
ак монды. 
Пäлет ма, господин Маркелов?
Цилä тидӹ провокаци,
мӹньжӹ гӹнь тӹлäнет короным
чиктäш йäмдӹ ылам.
Шукынжок попат, вуйта тӹнь 
нимахань критикӹм ат тырхы.
Лӹмӹнок газетвлäштӹш критикӹм.
Ат тырхат, нӹнӹлäн туан сäндäлӹкӹштем
пецäтлäш ирӹкӹм ат пу.
(Туан сäндäлӹкӹштем манмем 
ит йäтлӹ. Вет мӹнь тишкӹ толшы ам ыл
дä тӹдӹн рок мычкыжы цäрäяла
изиэм годымок эче кыргыжталынам.) 
Ти шотыштыжы гӹнь,
попашат уке, тӹнь тöр ӹштет:
малын вара оппозицилäн утла тӹргештӹлäш?
Мӹньжӹ гӹнь диктатура верц ылам доко.
Пу, анжыкты диктатурым! Ли тӹнь диктатор!
Мäмнäн диктаторна! Монденä демократим! 
Тенге куштылгырак!
Мä донна тенге вуйлаташ куштылгырак!
Тӹдӹвлä доно, кыдывлäн йӹлмӹштӹм ат
пäлӹ, ат ынгылы. Манеш-манешвлä каштыт,
тӹнь вуйта мары халыкым ат яраты.

Орависола Савик